Faatulagaina o Aiaiga – Gagana Samoa

Mafuaaga na faavae ai le Sailiiliga

Na faavaeina e le Malo le Sailiiliga lenei e tusa ai ma manatu mai le mamalu o le atunuu ia faatino se sailiiliga i soo se vaega uma i sauaga ma faiga tuulafoai, i totonu o auaunaga a le Malo ma faalapotopotoga o loo faamalosia ai le ola faatuatua e tusa ai ma le tausiga o loo latou faia.

Tulaga e mafai ona matou suesueina

O le a matou suesueina sauaga ma faiga tuulafoai i tamaiti, tupulaga ma tagata matutua o loo i se tulaga maaleale, sa faia i ai le tausiga a auaunaga a le Malo ma faalapotopotoga o loo faamalosia ai le ola faatuatua i totonu o Niu Sila i le va o le 1950 ma le 1999. Matou te ono faia se faatatau e tusa ai foi ma sauaga ma faiga tuulafoai sa tutupu i tua atu o le 1950, poo luma mai o le 1999, e aofia ai ma tagata o loo faia pea i ai le tausiga i le taimi nei.

Fesili e limataitaiina ai la matou sailiiliga

E aofia ai fesili nei:

  • Na mafua aisea le tausi o tagata i lea faiga – faaaofia mai ai pe na i ai ni faiga faaituau, faailogatagata poo ni faaiuga sese sa faia e faalapotopotoga.
  • O a sauaga ma faiga tuulafoai sa tutupu – o a mea na tutupu ma o le a le umi na tutupu ai?
  • Na mafua aisea – o le a na faigofie ai ona tutupu sauaga ma faiga tuulafoai i tagata?
  • O a aafiaga mai nei faiga – i le tagata ua afaina, o o latou aiga ma isi. E aofia ai aafiaga i se taimi umi ma aafiaga i tupulaga fai mai.
  • O a mea na maua mai ai – o a suiga sa faia i tausaga ua mavae e faatatau i sauaga ma faiga tuulafoai, e aofia ai tulafono, pulega, ma gaioiga e vaavaaia ai nofoaga o loo faatino ai le tausiga?
  • O faapei le faatinoga o polokalame i le taimi nei – e aofia ai taui tupe ma le faagasologa o le tausiga e toefuataiina ai le malosi i le taimi nei.
  • E faapefea ona faatino faiga i se tulaga e sili atu ona lelei i le lumanai.

Faatinoga o la matou galuega

E tele auala o le a matou aoina mai ai faamatalaga: faalogo i tagata, faia fonotaga ma le lautele, talosaga tusitusia o le a tuuina mai, ma le aoina o faamaumauga. O le a matou faatinoina foi se suesuega. O loo ia i matou le pule e faatonu ai tagata ma faalapotopotoga, e aofia ai faalapotopotoga a le Malo, latou te tuuina mai ai faamatalaga ma faamaumauga.

Auala o le a matou faalogo ai i manatu o tagata

E tele auala e mafai ai ona matou faalogo i manatu o tagata:

  • fonotaga faapitoa (lea foi e ta’ua o Tukutuku);
  • fonotaga lautele;
  • faafesagaiga;
  • talosaga tusitusia.

A matou faiga taualoa

Matou te faatauaina le Te Tiriti o Waitangi. O loo limataitaiina foi i matou i faiga taualoa e aofia ai:

  • saogalemu;
  • faamuamua tagata ua afaina ma ua faasaoina mai;
  • faatauaina o manatu a aiga;
  • galulue faapaaga ma iwi ma Māori;
  • faatauaina tagata Pasifika;
  • faafaigofie le auai ai o tagata e i ai manaoga faapitoa poo faaletonu i le mafaufau;
  • faatino se faatatau i aafiaga eseese i tagata taitoatasi poo se vaega;
  • ia iloa ava ma amanaia le eseese o tulaga maaleale o loo feagai ma tagata o loo faia i ai le tausiga;
  • faamautuina le faagasologa o faiga sao ma le talafeagai mo tagata taitoatasi ma faalapotopotoga o loo fesoasoani i le faatinoga o le tausiga; ma
  • faafaigofie le faamalamalamaina o manatu.

E tutoatasi matou

E tutoatasi lava le Royal Commission mai le Malo ma faalapotopotoga o loo faamalosia ai le ola faatuatua. E fai lava e i matou a matou faaiuga ma fautuaga.

Faiga o a matou lipoti

E lua lipoti o le a matou tuufaatasia:

  1. Ao lei oo i le faaiuga o le 2020. O le a aofia ai faiga sa matou mauaina i le taimi lava lea, o mataupu tetele, ma le toatele o tagata ua faailoa mai o latou aafiaga, ina ia mafai ona matou faia se faatatau i punaoa o loo moomia e faamaea ai galuega. E mafai ona matou tapenaina ni fautuaga mo suiga i le taimi lea, nai lo le faatali seia maea le Sailiiliga.
  2. Ao lei aulia Ianuari 2023. O le lipoti aloaia mulimuli lenei. O le a matou lipotiina tulaga sa matou mauaina e tusa ai ma sauaga, o le ogaoga na oo i ai, o aafiaga i tagata, o tulaga sa faaleleia, ma tulaga e tatau pea ona faatino.

O le a matou tuuina atu fautuaga i le Malo ma faalapotopotoga o loo faamalosia ai le ola faatuatua i vaega nei:

  • suiga i tulafono, pulega ma faagaioiga o galuega;
  • faiga e moomia ona faagaioi e foia ma tali atu ai i sauaga ma faiga tuulafoai i le lumanai;
  • faiga e moomia ona faatino e fesoasoani ai i tagata sa sauaina poo le tuulafoaiaina (taui tupe, faagasologa o faiga e toefuataiina ai le malosi ma taui tupe);
  • faapefea ona faatino se faatatau i se faalavelave ua tupu; ma le isi itu
  • o faatoesega.

Ua matou tapenaina le otootoga lenei e fesoasoani e faamalamalama i tagata le Faatulagaina o Aiaiga.

E le o suia i ai le atoaga o le Faatulagaina o Aiaiga.